مصادر الدخل القومى

من فترة كده كنت قرأت خير أن أمريكا ومجلس الأمن والأتحاد الأوربى وناس تااااااااانيه كده كتير كانوا بيضغطوا على كوريا الشمالية لوقف صناعة الصواريخ (طبعا صوااااريخ حربية مش الصواريخ اللى بيفرقعوها العيال فى رمضاااان), لأن فى الوقت ده تقريبا كانت كوريا بااااعت كام صروووخ كده تقريبا لأيراااان أو دوله تانيه مش فاكر مين

وكان تعليق كوريا على الأحداث دى, هو أنها مش هينفع توقف صناعة الصواريخ (ركز بقى فى الحته اللى جايه دى) لأنها بتعتبر مصدر رئيسى من مصارد الدخل القوووووومى لكوريا

خدت بااااالك من الرد بتاعهم, الناس بتقول أن تكنولوجيا صناعة الصوارررريخ هى جزء من الأقتصاد وهى اللى بتجيب دخل للبلد, فى الوقت اللى فى ناس تانيه بتعتمد أعتماد رئيسى على السياحه وديما شعاااار السياحه هى أهل البد وناسها هو الشعار الرئيسى بتاعهم

ياااااااجماعه أفهموها بقى, لو مكنشى عندنا حااااااجه بنعرف نعملها والناس بتحتجنا عشان أحنا أحسن ناس بنعمل الحاجه دى, مش هيبقى لينا لازمه وفى أى وقت هيداااااااس علينا, جميل أنك يبقى عندك سياحه (محترمة) بس مينعشى تكوووون هى عنصر أساسى فى الدخل القومى لأن ببساطه سهل أوى أن العنصر ده يضرب فى أى وقت من الأوقات وساعتها بقى مش هيبقى فى حاجه نعرف نعملها

البيت بيتك

بقالنا كتيييير مشوفناش بعض ... مسلمناااااااااش على بعض

طبعا الأغنيه دى بقت مشهورة من فتره بسبب أنها بتيجى دايما فى برنامج البيت بيتك
برنامج البيت بيتك هو برنامج بيجى على القنوات الأرضيه والقناة الفضائيه المصريه بدعم من التلفزيون المصرى ووزارة الأعلام

على الرغم من كده بتلاقيه بيناقش قضايا ساخنة فى البلد, وأحيانا بيروجح جايب مسئولين عن بعد الخدمات فى الدوله ويروحوا غسلنهم كده على الهوا وقدام الناس

طبعا هتقولى , وأنت أيه اللى مزعلك من كده, أما بنى أدم غريب صحيح

هقولك يااااعم أنا مش زعلان, بس هى الفكره ماهو من الزمان أوى وفى مسئولين عفوا فى اللفظ بيستهبلوا, أشمعنا اليومين دوووول اللى بنعمل كده فيهم أيه حظهم وحش مثلا

بصوا أنا عندى وحهة نظر متواضعه فى الموضوع ده بس أنا مقتنع بيها اللى حد كبيييير
الموضوع أنا فى خلال الكام سنه الأخيرة كتييير من الناس بقى عنده طريقه سهله للوصول اللى القنوات الفضائية المختلفه خلال الأقمار الصناعيه
فتلاقى الناس تسمع على قناة الجزية مثلا , حصل فى مصر كذا وكذا وكذا. يروووح الواحد قالب على القناة الأرضية, يلاقى الناس بتقول كله تمام والأمن مستتب وكل شئ على مايرررررام

ده عمل أيه بقى, خل الناس متبقاش عندها ثقة بالتلفزيون المصرى, ومبقوش يتفرجوا عليه أصلا ألا فى ماتشات الكورة اللى مش مذاعة على الفضائيات, يعنى ببساطه لو الحكومة حبت تقووول أو تضحك على الناس بحاجه مش هتعرف, لأنهم مش هيعروفوا يوصللهم أساسا

فى الوقت ده بقى جيه البرنامج العظيم البيت بيتك, وبقى هدفه أعادة جذب الناس لمشاهدة التلفزيون المصرى تانى, ومفيش مانع عشان أعرف أعمل كده أنى أروووح جايب كام كبش فدا وروووح غاسلهم على الهوا (على فكرة مش لازم يكون بسابق ترتيب) وطبعا الشعب المصرى طيب جدا جدا وهيصدق
يعنى من الأخر أنا بعتبر برنامج البيت بيتك هو برنامج لتخدير الناس وبقترح يغيره أسمه لخدر بيتك :)

بس برضه عشان أبقى أمين هو ممكن ماكونشى أنا شايف جميع جوانب الموضوع, بس هى دى وجهة نظرى اللى ممكن تبقى صح أو غلط

أهى جت على دماغكوا

عزيزى القارئ, طبعا لو أنت متابع للى بيحصل حوليك اليومين دووول هتبقى عارف أنى فى أضراااب عاام من مختلف القوى السياسيه (عدا الحزب الوطنى طبعا) بوم الأحد القادم وذلك أعتراضا على أرتفاع الأسعار وثبات المرتبات
هو أنا مش هنتناقش فى فكرة الأضراب نفسه وهل هو صح ولا غلط وهل المفروض نشارك فيه أو لأ, أنا عن نفسى يوم الأحد أنا بأخده أجازه فكدا كدا مش هخرج يعنى ;)

أنا بس عايز اناقش حاجه تانيه لفتت نظرى وانا بقرأ الأخبار المتعلقه بالأضراب ده, كان فى مقال على موقع مصراوى (على فكره المفروض أساسا مش ندخل على الموقع ده لأن صحبه كان عمال بيشتم فى المسلمين من كام شهر كده) كان بيقول أن أيمن نور هيشارك فى الأضراب هو كمان ليش من أجل مطالب خاصه ولكن من أجل المطالب العامه المتعلقه بالغلاء وثبات الأجور

برضه مش هى دى المشكله , لو كنت قرأت المقال هتلاقى فى أخر كام سطر كده مكتوب الكلام ده

"وأعلن ان عمال المحلة سيقومون بإضراب عام فى المحلة الكبرى في ذلك اليوم ليس لهم فحسب بل لكل الفئات والطبقات وان وشعارهم أصبح التغيير السياسى وليس مطالبة ببعض البدل وبعض الزيادة فى الأجور."

فاااااااكرين, الناس دووول كان من كام شهر كده معتصمين وعاملين أضراب برضه, كل اللى كانوا عايزينوه أن المرتبات والحوافظ تزيد شويه, وعملوا أضراااااب فتره, وكالعاده محدش سأل فيهم
رااااحوا عاملين أضرااااب تانى, بس كان لفتره أكبر , ساعتها بس الحكومة أستجابت ليهم وحققوا المطالب بتاعتهم
بس فى الوقت ده كانت الناس أتعلمت أزاى تعمل أضرااااب, أكتر من كده أن عمااااال المحله نفسهم دلوقتى بقوا بيمثلوا كتله, الأحزاب والقوى السياسيه بتستخدمها ضد الحكومه على الرغم أن كانت كل مشاكلهم ممكن تتحل ببساطه ومن غير أضراااااب ولا وجع دماااغ, شوفتوا بقى أهى جت على دماغكوا أزااااااااى

على فكره كده ظلم

دلوقتى بقى ياجماااعه أنا هتكلم فى موضوع فعلا خانقنى, بصراحه فى حاجات كتير خنقانى, بس لو قعدنا نكتبهم كلهم مش هنخلص

بصوا زى ما أنتوا عارفين أنا بفضل الله خطبت من كام شهر كده
أيه يااااااعم أنت محسسنى أنها مفاجأه, خلاص أمة لا اله الا الله عرفت واللى حصل حصل
مش هى دى الفكره, الحمد لله أنا حطبت ومقتنع بخطبتى جدا وأعتقد برضه والله أعلم أنها مقتنعه بيه (هبقى أسأل فى الموضوع ده) والدنيا كويسه وأنا بحمد ربنا دايما أنى وفقنى وخطبتها وبدعيه ان يتم الباقى على خير
طبعا هتقولى أنت جى تحب هنا ولا أيه, هقولك أصبر بس متبقاش متسرع كده

الفكره كلها أنى عايز أقارن بين نموذج الناس اللى كانت بتخطب وتتجوز زمان ونموذج الناس اللى بتخطب وتتجوز اليومين دوول والمفروووض أحنا نبقى فين
زمااان فى عهد الرسول صلى الله عليه وسلم وفى عهد الصحابه والتابعين رضوان الله عليهم من بعده
كان بيجى الشاب كده, مالى مركزه, ويكلم أبو العروسه, يقولوا يا بمشهندس أنا فلان بن فلان من قبيلة فلان وعايز أتجوز بنتك
يروووح الراجل أبو العروسه منفذ الخطوات اللى قلنا عليها الأسلام من الرؤيا الشرعيه وخلافه وبعدين ياخد رأى البنت وتمام على كده
العريس يرووووح يجيب الخيمه ويعملها الباب المتين ويتوكل على الله ويقدم المهر, وأدلع ياعريس وأتمخترى ياعروسه وخلاص
كل الكلام ده ماعتقدشى أن يياخد وقت يذكر, أنا بصراحه معرفشى وقت محدد من خلال قريتى فى التاريخ والسيرة بس أنا أعتقد أنه كان فى الذيذ يعنى

يالا بقى نركب ألة الزمن ونروووح كده القرن الحادى والعشرين ونشوف ايه اللى بيحصل فيه
يجى الوااااد الغلبان لأبوا العروسه ويقولوا أنا عايز أتجوز بنتك, يقولوا يا أهلا يا أهلا
يابنى أحناااااااااااااا بنشترى راااااااااااجل
تمام طيب قدامك أد أيه, يعنى قدامى يجى 3 أو 4 سنين كده أكون جهزت نفسى,
طيب تمام مفيش مشكله, والواد يفضل داخل خارج مع البنت وكأنهم متجوزين بقالهم سنتين تلاته ولا حاجه مش لسه مخطوبين ويعدين يجى فى الأخر تحصل مشكله, هوووووووب ويسبها عشان محصلشى نصييييب, بص هو أنا مش عارف أحساس البنت بيبقى أيه ساعتها بس أكيد بيبقى أحساس بالدمار الشامل , حاجه كده زى قنبلة هيروشيما ونكزاكى بتاعة اليابان (طبعا ولا أنت عارف مين هيروشيما ولا نكازاكى ولا فين حتى اليابان دى أصلا)

المهم قصر الكلام, طبعا النموذج التانى ده مرفوووض لأنه على الرغم أن الشاب والبنت بيبقوا مبسوطبن فى الأول بس هو بيبقى ضد الشرع أصلا

نيجى بقى ونقووول طيب تمام يالا يا أولا تعالوا نخطب ونتجوز بس مش عايزين نغضب ربنا
جمييييييييييييييييييييييييييل
الشاب برضه يجرى يرووووح لأبوا العروسه ويقالوا ياعمى أنا عايز أتقدم لبنتك
والراجل يوافق و يشوف الشرع بيقول أيه وينفذه من رؤيا شرعيه وخلافه,
وبعدين نظرا لظرووووف الغلاء ولظروووف أخرى خارجيه يحصل أتفاق أن الخطويه هتعوووود حبه حلوييين كده يعنى سنه ولا سنتين

طبعا مش هينفع يكون زى النموذج الأولنى , لأن كان زمااان الواحد بيجيب خيمه أم باب متين ومهر وخلاص, لكن دلوقتى فى حاجه أسماها حديد عز وفى حاجه أسمها أن البنت بتدرس وفى وفى وفى وفى وفى من الأخر فى كل حاجه
وفى نفس الوقت مش هينفع النموذج التانى عشان هما بيعملوا أساسا حاجه مش صح
وتبتدى الرحله, الواااد يعينى يشوف البنت كل شهرين تلاته مره ولا حاجه وتكون المره دى 45 دقيقه زى ماتش كرة القدم, ده حتى ماتش كرة القدم على شوطين, طبعا فى علماء أجلاء بيحرموا الكلام فى التليفون, وطبعا لازم نضع رأيهم فى الأعتبار برضه, فيبقى مفيش كلام فى التليفون كمان,

بس ياسيدى فتلافى أنك فى النهايه طلعت بنموذج ثالث بس هو أكثر النماذج تضررا , شوفتوا بقى أنى كان عندى حق لما كتبت عنوان المقاله أن كده ظلم

على فكره الكلام اللى أنا كاتبه ده فعلا من واقع الحياة من تجاااااااااااااااااارب نااااااااس كتير من صحابى
وللحديث بقيه بعد جلسة الأستراحه ;)
1

أنا لو من أمريكا هضاعف كمية القمح لمصر

طبعا العنوان يبدوا غريب جدا, أزاى يعنى أنت لو مكان الأداره الأمريكية هتزود كمية القمح المصدره لمصر على الرغم من كل المشاكل والمشاحنات اليومين دووووول
أقولك ياسيدى الموضوع مش غريب ولا حاجه, فعلا لو أمريكا بتفكر صح, يبقى المفروض تزود بل تضاعف كميات القمح اللى بتصدرها لمصر كل سنه,
بصوا هو أنا مش خبير أسترتيجى, ولا حتى هدعى أنى ملم بالجوانب السياسيه والأقتصاديه
بس العمليه بسيطه, أحنا زمان (اللى هو زمااان قوى يعنى) على حد علمى كان عندنا أنتاجيه من القمح تكفينا بل كنا ممكن نصدر منها, بس لم جت أمريكا وبدأت تصدر قمح بسعر أقل من التكلفه, كان الطبيعى أننا نبدل زراعة القمح بحاجه تانيه, مادام فى ناس (ولاد حلال) بيدونا القمح بتكلفة أقل من أننا نزرعه, ده حتى يبقى عبط لو زرعناه أحنا
أمريكا أو غيرها كسبة أيه بقى من حاجه زى كده, مع أن فى الظاهر أنها خسرانه
فى الواقع هى كسية حاجات كتير, صحيح مش لازم يبقى منها فلوس , بس فى حاجات كتير أهم من الفلوس
أولا هى نسفت زراعة القمح عندنا, وبقى الناتج المحلى لا يكفى للأستهلاك المحلى, فديما هنبقى معتمدين على القمح اللى جى من بره (طبعا مش لقمة عيشنا)
حاجه تانيه, أنها ممكن تبعتلنا قمح مغلف بمواد مسرطنه, والشعب طبعا بياكل ولا فى دماغه, فكده كمان ضمنت أن صحت الشعب راحت فوق البيعه
الحاجة التالته بقى, أن لو حصل ونشب أى خلاف أو حرب أول حاجه هتعملها أنها تمنع تصدير القمح, وزى ما أحنا متفقين أحنا الأنتاج عندنا خلاص أنتهى , وبالتالى هتبقى فى حرب فى البلد داخليه (على رغيف العيش) بجانب الحرب الخارجيه

طبعا مكاسب كبيره جدا, بس اللى حصل اليومين دووووول أن أصحاب الأفران بيبعوا الدقيق المدعم فى السوق السوده, وعشان كده ظهرت مشكلة رغيف العيش المشهوره, وده خلى ناس كتير تنتبه الى خطورة الموقف, عشان كده أنا بقول أن أمريكا المفروض تزود كميات القمح المصدره لينا عشان المسكله تتحل والناس تفضل عيشه فى مية البطيخ (مع الأعتذار للبطيخ طبعا) زى ماهيه

معلومة أخيرة, مش فاكر كان فى مؤتمر كده مش فاكر كان أمتى, المؤتمر ده كان فيه رئيس وزراء الصين أو الياب, وكانوا ريحين عشان يتفضوا على حاجه, أول كلمة قلها رئيس الوزراء ده كانت "نحنا لا نستورد حبة قمح من الخارج"

مش عارف بصرااااااااااااحة كان يقصد أيه ;)
1

كلام قهااوى

بسم الله الرحمن الرحيم

سااااااعات كتير الواحد بيكون عايز يتكلم فة مواضيع خاصه بالواقع اللى حواليه, ممكن تبقى مواضيع سياسيه, أجتماعيه, أفتصاديه أو أى حاجه تانيه
أحيانا بتبقى حاجات مهمه وأحيانا تانيه بتبقى هايفه برده
أنا شخصيا كنت متعود أتكلم فى المواضيع (أو الموضوعات عشان محدش يزعل) مع صحابى أيام ماكان ليا صحااااب بعرف أقبالهم, بس طبعا مع تقدم السن طل واحد أنشغل بمشاكله فى الحباه, اللى عايز يغير شغله, واللى عايزيجيب عربيه, واللى عايز شقه يتجوز فيها واللى بيدور على عروسه واللى واللى واللى والنتيجه فى النهايه واحد صفر للأهلى قصدى النتيجه أننا مش بقنا نتقابل ونتكلم الككلام بتاع زمااان
عشان كد أنا قررت أنى أعمل المدونه دى عشان أكتب عليها الكلام اللى كنت بقولوه مع العيال صحابى, وقررت أنى أسميها كلام قهاوى
على فكره أنا مش من المحبين للجلوس على القهاوى (أو المقاهى) خاااالص , بس الفكره أن اللى هيبقى مكتوب على المدونه هنا هيبقى غير مراجع وغالبا باللغه العامبه طبعا أنسى حكاية لأنجليزى دى خاااااالص, كلام طالع من القلب كده على طوووول من الأخر كلام قهاوى