تعس عبد الدينار ، والدرهم

الواحد بقالوا كتير مش بيكتب فى البلوج, لدرجة أنى حسيت أنه بيزيق من كتر الركنة لما جيت أفتحة النهارده ...
ماعلينا خلينا فى موضوعنا, النهاردة كنت عايز أتكلم شوية على اللى بيحصل فى مصر من تدهور الأقتصاد وخصوصا البورصة المصرية وده بسبب الأزمه الأقتصادية اللى بيشهدها العالم كله...
أنا بقالى فترة شغال فى شركة بتعمل برامج لتسهيل حركة التدول فى البورصة وعشان كدة ببقى قريب شوية من الحاجات اللى بتحصل, طبعا أنا عارف أن ممكن حد يقول أن البورصة حرام, وأن فى أراء فقهية بتقول أن فيها ربا واضح, هو أنا سألت فى الموضوع دهة وعندى معلومات لا بأس عن شيوخ نحسبهم على خير ولا نزكى على الله أحد, بس مش وقتها دلوقتى’ نبقى نتكلم فيها بعدين أن شاء الله
اللى بيحصل عندنا فى البورصة بقى هو أنهيار درامى زى ما الخبراء بيوصفوا
فتلاقى مثلا شركة كان السهم بتاعها ب 450 جنيه, دلوقتى نلاقية ب 100 جنيه بس...
يعنى بحسبه بسيطه لو كان واحد ليه 1000 سهم, يبقى دلوقتى هو خسر حوالى 350,000 ألف جنيه, وده فى الكام شهر اللى فاتوا
وتلاقى شركه تانيه السهم بتاعها كان ب 45 جنية , دلوقتى تلاقية ب 13 جنية, يعنى تقريبا نفس النسبة فى الخسارة مع أختلاف الفرق مابينهم
عشان كده ده بيفسر الحوادث اللى بنسمع عنها فى الأخبار , وأننا نلاقى واحد أنتحر وموت نفسه, ونلا واحد تانى قتل ولاده ومراته وبعد كده موت نفسه برضه, وكل ده عشان الخسارة الرهيبة اللى بيخسروها
فى الوقت ده الواحد ديما بيفتكر حديث الرسول صلى الله عليه وسلم

6188 - تعس عبد الدينار ، والدرهم ، والقطيفة ، والخميصة ، إن أعطي رضي ، وإن لم يعط لم يرض

الراوي: أبو هريرة المحدث: البخاري - المصدر: الجامع الصحيح - الصفحة أو الرقم: 6435
خلاصة الدرجة: [صحيح]

ملحوظة بس صغيرة, هو الواحد لو كان مكانهم مش عارف كان ممكن يعمل أيه , بس والله أعلم فى حدود مينفعشى حد يتعدها, يعنى مثلا أنه ينتحر أو يموت ولاده بس عشان خسر كل فلوسه, فهو كد خسر الدنيا, وكمان راااايح عشان يخسر الأخره